O portavoz do PSOE en Santiago referiuse este luns en Radio Obradoiro ó asunto do Códice Calixtino. Logo de felicitarse polo achado do manuscrito en bo estado, Xosé Sánchez Bugallo sinalou que "todo o que está trascendendo, prodúcenos unha sensación de perplexidade e desacougo, por dicilo suavemente". Neste sentido, lamentou que "non haxa un inventario dos bens patrimoniais e artísticos da Catedral", amosouse sorprendido "polas condicións de conservación" deses bens, e tamén se preguntou "que pasa coas aportacións dos fieis", despois dos cartos que lle foron incautados ó presunto autor material do roubo, Manuel Fernández Castiñeiras.

En opinión de Sánchez Bugallo, "a Catedral precisa un plan de seguridade en tódolos sentidos". O concelleiro espera que o sucedido sirva para que "se tomen as medidas oportunas, e se monte un sistema de seguridade adaptado ós tempos actuais". Lembrou que durante a súa etapa como alcalde, "todos viamos que a Catedral funcionaba coma se o seu reino non fora deste mundo". Segundo dixo, "continuamente tiñamos un choque entre os que queriamos garantir a seguridade no templo, e os que pensaban que iso non era o máis importante". En calquera caso, tamén quixo agradecerlle á Igrexa que fora quen de "preservar o patrimonio e o legado do templo estes últimos 800 anos".

Á marxe deste asunto, o portavoz socialista volveu xustificar a solicitude dun pleno extraordinario felita polo seu grupo, para que o goberno explique por qué ocultou un informe de intervención que o PSOE pediu para antes do pleno no que foron aprobados inicialmente os presupostos. Sánchez Bugallo explicou que recibiron ese documento o 6 de xullo, "dúas semanas despois do pleno, e despois de que no departamento de Intervención nos dixeran que fora entregado o 19 de xuño". Ó seu xuízo, non llo fixeron chegar antes  "para que non demandaramos o cumprimento da Lei de Estabilidade Presupostaria nas contas de 2012, que deberían estar adaptadas a esa norma".

Volveu incidir o edil en que, a 1 de xullo de 2011, cando o PP colleu as rendas do goberno municipal, a débeda do concello era de 67 millóns de euros, "59 millóns correspondentes á debeda bancaria, e 8 millóns que reclamaba o Ministerio de Economía por un erro seu". O que non é correcto, dixo, é "que non se descontaran desa cantidade os 2,8 millóns de euros que Economía lle debía ó concello pola liquidación de 2010. Segundo dixo, dende que goberna o PP a débeda "non só non diminuiu senón que foi a máis". Agora é de 76 millóns, "polos 12,7 millóns que pediron para pagarlles ós proveedores".

Por último, Sánchez Bugallo referiuse á "espectacular caída" da vivenda en Santiago durante o primeiro semestre deste ano. Apuntou ó respecto que "en 2011 obtiveron licencia 300 vivendas, e nestes primeiros seis meses 28, ningunha de protección oficial e ningunha colectiva". Malia que cre que esta situación ten que ver en parte coa crise económica, non é, di, a única responsable. Dacordo cos seus datos, en 2008 obtiveron licenzas entre 1.000 e 1.200 vivendas, ó igual que en 2009, mentres que en 2010 foron unhas 700, e en 2011 unhas 667. Pasar desta cifra ás 28 do primeiro semestre só se explica, engadiu, "porque se cargaron o modelo urbanístico que había, e non foron quen de elaborar outro. Deixárono todo en mans da iniciativa privada, que agora mesmo non ten interese en construir vivenda, e menos vivenda colectiva".