O Festival Vía Stellae comezará o vindeiro luns a súa VII edición cunha programación que incluirá concertos en diferentes espazos de Compostela. O seu director artístico, José Víctor Carou, explicou en Radio Obradoiro que "o festival segue tendo o barroco como eixe pero aposta tamén pola amplitude de miras e pola fusión con outros xéneros como o flamenco, o jazz e a música contemporánea".  Así, destacou algunhas das propostas máis atractivas deste ano.  "A estrea da ópera de Haendel 'Rodelinda' da man de Vespres d'Arnadí o 10 de xullo, a oportunidade de desfrutar de concertos Vivaldi pouco coñecidos na cita inaugural co violinista Enrico Casazza ou a orquestra barroca Academia de Piaccere co cantaor Arcángel o día 5 de xullo".

Esta edición do Vía Stellae conta cun 75% menos de presuposto público pero sen embargo programa catro concertos máis. Carou explicou que  isto foi posible porque "capeamos a crise con imaxinación, traballo e coa colaboración de varias institucións".

Carou explicou que os concertos terán lugar na "sede principal que segue sendo o Teatro Principal",  no Salón Teatro, Igrexa da Universidade, Auditorio de Galicia, na Praza de Abastos, onde haberá concertos de jazz, na Zona C e o CGAC, "que será a sede dos concertos de música contemporánea".

As entradas están xa á venda e poden mercarse na billeteira do Teatro Principal e a través de Novagalicia Banco.