O Concello de Ames acolleu este xoves o pleno ordinario mensual, ó que o alcalde ía levar o debate dos presupostos deste 2012. Sen embargo, tal e como recolle El Correo Gallego, Santiago Amor decidiu aprazar este punto da orde do día pola anunciada ausencia de tres dos seus concelleiros, o que deixou o seu executivo en minoría. PSOE e Ames Novo tachan de cobarde ó rexidor, e xa anunciaron que van estudar "as vías xurídicas" para denunciar o ocorrido. O alcalde xustificou o aprazamento sinalando que era para que as enmendas da oposición ás contas puideran ser estudadas.

Este venres, en Radio Obradoiro, o responsable local do BNG en Ames, partido que ten representación institucional pero non política, explicaba que o sucedido "nos pareceu un auténtico atentado democrático". Dixo Alberte Souto que "este grupo de goberno abriu moitos frentes e creou moitos conflictos". Na súa opinión, "está provocando unha erosión social que se traslada ó político, e moitos ben que non é un executivo con bo eco na cidadanía".

A respecto das contas, o BNG sostén que "renuncian a loitar contra a crise". Souto sinalou que "se comparamos estos presupostos cos aprobados en 2010 por un goberno de signo diferente, vemos que hai moitas similitudes cando a situación agora é moi distinta". Os únicos cambios, engadiu, teñen que ver "coa previsión de caída dos ingresos e as medidas para cumprir co obxectivo de déficit". Segundo Souto, o BNG bota en falla "que non haxa un incremento do gasto social, tendo en conta a crise, nin tampouco medidas para estimular ou recuperar a actividade económica no concello".

O responsable local do BNG de Ames pensa que "o PP debería reconsiderar os presupostos e adaptalos á situación económica e social do concello".