A Academia Galega do Audiovisual "rexeita frontalmente" a suba do IVE en 13 puntos para as actividades relacionadas co mundo dos espectáculo. A produtora Emma Lustres, membro da directiva da academia, cre que estamos ante "un atranco máis" para o sector. En Radio Obradoiro sinalaba que o incremento "é inasumible para un mundo como o do cine, xa de por sí endeble e cun mercado complicado".

Na súa opinión, estamos ante unha medida "totalmente desproporcionada e que non ten ningún sentido, porque non vai cumprir ningún dos obxectivos para os que foi adoptada". Explicaba ó respecto que o Goberno central non recadará máis porque "ó subir os prezos, descenderá o consumo". Esta, dixo, será a principal consecuencia do incremento do IVE, xunto co feito de que "favorecerá que haxa máis piratería. Tamén beneficiará ás teleoperadoras que meten o internet na casa".

Emma Lustres lembrou que o sector audiovisual "xa está facendo esforzos, porque a produción baixou, a televisión paga menos polos seus produtos e, consecuentemente, tamén baixaron os salarios neste medio. Polo que respecta ó cine, tamén estamos sendo cooperantes nestes recortes. Fanse menos películas, máis baratas e polo tanto, menos competitivas". A produtora engadiu que "esta é a tónica xeral do país, non so nos toca a nós, pero é certo que nós estamos sufrindo moitos máis recortes".

O suba do IVE, a xuízo de Lustres, "é unha forma de que a cidadanía teña menos onde escoller". Cre que "o máis preocupante, sobre todo no mundo do cine, é a repercusión que vai ter sobre a diversidade cultural. Galicia ten moito que perder porque, por detrás de Madrid e Barcelona, é o lugar onde hai máis produción de cine e de televisión". Lustres pídelle ó goberno galego, "que aposta polo sector, que pelexe polos nosos intereses en Madrid".