Volpone "morre" esta fin de semana en Santiago

O elenco de 'Volpone', espectáculo que se representa esta fin de semana en Santiago FOTO: Talía Teatro

Talía Teatro representará no Salón Teatro este venres e sábado 'Volpone'. Serán as derradeiras funcións dunha das montaxes máis recentes desta compañía teatral de Cee. O seu director explicou en Radio Obradoiro este xoves que 'Volpone "é un espectáculo que contou con boa aceptación por parte do público pero é moi difícil de mover neste contexto de crise xa que conta cun elenco moi numeroso". Artur Trillo dixo que "se trata dun espectáculo clásico e cunha ambientación plantexada na época do autor, Ben Jonson, que foi coetáneo de Shakespeare". Segundo explicou a obra "fala de algo tan inherente aos tempos actuais como a apetencia desmedida polos cartos e a luxuria".

Talía Teatro instalouse a pasada semana en Santiago para ofrecer 11 funcións de dous dos seus espectáculos destinadas tanto a público escolar como xeral. Así, a pasada fin de semana, a compañía representou 'Pelos na Lingua', unha comedia que fala dos "usos e abusos que sufre o idioma galego" e que puxeron esta semana en escea para centros de ensino. Segundo Trillo, esta montaxe naceu para contar "con humor e sen agresividades" a situación de desvantaxe e a perda de prestixio e de falantes que sofre o galego.

As entradas para asistir a 'Volpone' estarán á venda no Salón Teatro dúas horas antes de cada función e tamén se poden adquirir por adiantado a través do teléfono 902 43 44 43 ou da web http://entradas.novagaliciabanco.es.